Overblog
Editer l'article Suivre ce blog Administration + Créer mon blog

Recherche

6 septembre 2018 4 06 /09 /septembre /2018 14:00

A ghjurnata di l’Adecec s’hè vulsuta umaggiu à Ghjuvanteramu Rocchi, u militante, u pueta, u pedagogu. U so soffiu militante ! Soffiu ch’ùn si riduce micca à l’annate settanta, dette di u riacquistu. Soffiu chi si vole rispiru, un ansciu,  a cuntinuità di a vita.

Issu soffiu militante in a cultura di a globalisazione oghjinca hè più ch’una resistenza hè a perennità di ciò chè no simu. Ci indetta a strada à seguità : cuntinuemu à parlà è à scrive in corsu. Dimmu quantu a lingua corsa, hè viva. Issa ghjurnata hè stata dinù dédicata à Pasquale Marchetti, omu di scrittura è di riflessione di u Murianincu, chì anch'ellu si n’hè andatu lasciandu un'opera di qualità. A sala colma s’hè arrizata in cumunione.

Rende umaggiu à Ghjuvanteramu Rocchi era di dà a parulla à quelli chi anu fattu un pezzu di strada à u so latu… è d’apre a ragiunata à l’insignamentu di u corsu è a piazza di a lingua corsa in a sucietà isulana.

Hè cusi chi Mattea Lacave hà ramintatu a fiaccula di a so vita. Issa fiacula chi hà purtatu Ghjuvanteramu à scrive, à parlà, à cantà, à sparte, à trasmette.

Sonia Moretti, s’hè impuntellata  a l’opera diviziosa « Battistelle » è  u travagliu spartutu cun Ghjuvanteramu Rocchi chi currispondia à entre in un tempu foltru, di dumande, di cuntrastate, di cunfronti d’idee è di smeravigliata pettu à un omu fattu da u so rapportu à u so mondu, in quistiunamentu perpetuu à prò di a lingua è di ciò ch’ella pudia porghje à ogni zitellu.

Cun Ghjispeppu Turchini, s’hè sappiutu à chì ne simu oghje chì ghjè oghje di l’insignamentu di u corsu, additendu e realità d’un bilanciu ch’un n’hè micca esente di difficultà.

Lisandru de Zerbi, fundatore di l'associu Praticalingua hà prisentatu a struttura chì vole permette l'amparera è a spartera di a lingua corsa, per mezu di a so pratica in immersione.

Altri anu fattu sente a so voce per u pueta è u pedagogu. Shè cusi intesa una puesia di Guidu Begnini « Porta Voce », a testimunienza di Stéphanie Raffini, giovana stitutrice per quellu chì avia l’arte d’amparà è tramandà u so sapè. E dinù i versi di Ghjuvan Paulu, l’amicu paisanu cusi cumossu.

Più tardi, in cunventu di Cervioni, toccava à Feli di rende umagiu à u so cumpagnu di strada, nanzu di sparte a scena cun Canta u Populu Corsu, cun l’aiutu di l’acque d’Oerzza. D’issi cuncerti chi rallegravanu u pueta.

« L’avvene hè bellu » dicia Ghjuvanteramu Rocchi, è l’avvene appartene à quelli chi u sunnieghjanu. L’hà detta Ghjiseppu Turchini : «Ghjuvanteramu facia di i so sogni una realità. A noi dinù, nù e scole, in carrughju,  di praticà è di fà d’ista lingua una brama, un bisognu, un ernese, un utopia, un’apertura à l’altru, una manera di dì u mondu è seremu salvi, uniti, fieri è spannati».

L’umaggiu à Ghjuvanteramu si prusegue in Cervioni, à l’occasione di e ghjurnate di u patrimoniu, induve seranu présidente à u publicu, duie mostre chi contanu a vita di u pueta di l’Oretu.

Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi
Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi
Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi
Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi
Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi

Discorsu presidente

 

Tante ghjurnate si so tenute quì, o accantu, tante decizioni si so pigliate, tante cose so state discutate.  Avimu trovu? Avimu cresciutu?

 

Avimu fattu, « avimu un cornu » cum'ellu discerebbe Petru Mari chè no salutemu cusi forte chì da u prufondu di u paese di Vignale ci sente.

 

Serebbimu ghjunti à un puntu di speranza tantu piacente per a lingua corsa.  A l'orlu di a cuufficialità, in l'ortu cum'ellu dice Ghjanfrancescu Bernardini.

Rimpiazzà l'andatura cuntestativa è salvatrice d'un muvimentu rivendicativu per strutture amministrative, ùn po esse solamente a suluzione. Po esse una partita di u scopu, i guardiani militanti essendu i puntelli di a dimarchja. Ma chì so sti discorsi, quessa tuttu u mondu à sà. Mà cum'ella si sà, ci hè bisognu di dilla. È tuttu hè quì. Ùn entrimu in porci rossi, è venimu ne à i fatti.

Oghje avimu à mentuà, l'omu, u pueta, u scrivanu ch'hè statu Ghjuvanteramu. È dinù ricordà a perdita di Pasquale Marchetti, omu di scrittura è di riflessione di u Murianincu, chì anch'ellu si ne hè andatu lasciandu un'opera di qualità. Puntellu maiò di a scrittura, di e regule di issa scrittura. Per sti dui omi è per tutti l'altri,  arrizemuci un mumentu per cummunicà tutti inseme.

 

Oghje si tratterà sopratuttu di Ghjuvanteramu, di a so opera, tamanta, di a vita di st'omu stranu quantunche, postu chì da u prufondu di 1970 mettia in rime tante riflessioni, tante canzone, in un corsu cusi piacente.

Dì induve ne simu, dì duve venimu. That is a trappula.

 

Leghju à dapertuttu chì per sapè induve n'andemu ci vole à sapè d’induve venimu. Ci vole dunque à rompe u ghjoculu. Ci so tante spiecazoni mà nissuna cunvene veramente, scientifiche, riligiose è altre. Aghju voglia di cuntà chì stu misteru di a creazione ferma u sale di a vita. È d'aghjustà chì l'ignuranza hè custi una richezza. O almenu una libertà. Forze à sola vera ch'omu sparte tutti inseme. U risicu togliandu issu puntellu chì permette à a nostra terra di gira, hè ch'ellu si ne fali tuttu à caternu. A richezza di st'ignuranza serebbe di lascià à tutti a scelta di u misteru di a vita, da u principiu. Ognunu ne face u so parcorsu, senza inticcià l'altru.

 

Dicenu chì amparendu chì u Supranu hà datu l'intelligenza à l'omu, u pesciu hà dettu: "allora simu fritti". Circhemu d’ùn fini micca indè a frissoghja è un fà nè u pesciu nè  l'omu !

Lasciu a parulla à  Roland Frias, incaricatu di fà u muderatore d’issa ghjurnata.

 

 

Mattea Lacave, insignante, agghjunta à a merria di Bastia, in carica di a cultura

 

A fiaccula di a vità

Fà ch’in la memoria cumuna ,

Fiaccula ci n’hè sempre una

Quella di u vulè campà

 

Una fiaccula chì Ghjuvanteramu purtava in ellu stessu, militante instanchevule di a lingua corsa, di a cultura corsa è di l’Educazione.

Quessa a fiaccula l’hà purtatu à scrive, à parlà, à cantà, à sparte, à trasmette…….

Simu ingrandati cun ellu, simu à tempu figlioli è eredi di a so opera, litteraria, didàttica ma dinù filusòfica.

Scegliendu d’impegnà si in u mondu assuciativu, pudemu oghje testimunià di quantu hè stata pulitica a so dimarchja è quant’ella hà permessu di cunvince è d’avanzà. Da scola aperta à a GASPA, u spaziu assuciativu era quellu induv’ellu si pudia spannà, induv’ellu pudia trasmette tutti i so tesori cù sempre sta fiaccula chì lucicava in li so ochji. Una testimunianza d'un pezzucciu di strada fattu à fianc'à ellu.

 

 

 

 

 

Sonia Moretti, Prufessore di lingua è cultura Corsa. A so opera si cumpone di nuvelle chì anu participatu à rinnuvà a scrittura di prosa puetica, certe premiate è di duie racolte di puesie Discrittura è Puesie di a curtalina. In issi testi ci s’intreccianu parechji temi, zitellina, amore,…trattati cù una malincunia legera è irunia à le volte chì ne facenu a so uriginalità. Hè dinù parulliera per parechji gruppi.

« Ghjuvanteramu Rocchi è Battistelle »

Parte da l’opera diviziosa di Ghjuvanteramu Rocchi è sceglie ci qualchì testu, fà li illustrà da un artista chì sappia rispettà u mondu è e lettere di l’autore, era quessa a scummessa; ferma oghje u libru “Battistelle”, chì lega isse filastrocche oramai patrimuniale è l’inzeccature esigente di Marine Rivoal.

Parlendu di stu libru, si parla di u travagliu chì ci hè à daretu, ma sopratuttu di i scontri, di e vie pigliate, di bislinguisimu, di cunversazioni, di contrapunti...

Travaglià cun Ghjuvanteramu era entre in un tempu foltru, di dumande, di cuntrastate, di cunfronti d’idee è di smeravigliata pettu à un omu fattu da u so rapportu à u so mondu,

in quistiunamentu perpetuu à prò di a lingua è di ciò ch’ella pudia porghje à ogni zitellu. Battistelle, sì... issu titulu, quasi quasi, riassume ciò ch’ellu facia sempre, quand’ellu scrivia, l’autore di L ‘Oretu di Casinca...

 

 

 

 

Ghjiseppu Turchini, insignante di corsu, presidente di l’associu de l’Insignanti Lingua è Cultura Corse

 

« Insignamentu di u corsu : à chì ne simu oghje chì hè oghje ? »

 

Tematiche sviluppate : ritrattu di u dispusitivu attuale ; realità è valutazione di a so efficacità; perspettive d'avvene à cortu è mez'andà ; insignamentu è pratica sculari è sucetali.

 

 

 

 

 

Lisandru de Zerbi, 34 anni, hè insignante di LCC à l'IUT di Corsica è fundatore di l'associu Praticalingua.

Cunfratellu in Santa Croce di Bastia è cantore in u so paese di Sermanu, hà publicatu Messa è Santi Nustrali, in u 2017, racolta di testi di messa cù e so traduzzione da u latinu à u corsu.

« Da a prumuzione à a diffusione di a lingua corsa »

Descrizzione di l'associu:

Praticalingua hè una struttura chì vole permette l'amparera è a spartera di a lingua corsa, per mezu di a so pràtica in immersione. Grazia à l'impegnu di 12 furmadori, l'aderenti ponu truvà in stu locu di spressione cursofunu, un interessu creativu à a pràtica di u corsu in tanti duminii : cantu, musica, arte, literatura, teatru, ma dinù e lingue strangere (inglese, talianu, spagnolu).

Per a rientrata 2018, sò previsti 37 attelli settimanali, gestiti da 25 furmadori rimunerati.

À Ghjuvan Teramu Rocchi

 

Portavoce

 

Pueta fratellu, truvesti le rime

cun l’estru è l’asgiu di le alte cime.

Fusti lu fanale di la nostra brama

è lu Portavoce di l’antica chjama.

 

Ùn vale discorsu, ùn vale lamentu,

ramentu ci tene fora di lu pientu.

Ti stai oramai pueta di fama

è lu Portavoce di l’antica chjama.

 

U tempu pò corre è girà lu mondu,

sterà lu to versu in noi nascondu,

canterà l’amore, tesserà la trama

di tè, Portavoce di l’antica chjama.

 

 

Guidu Benigni,

Campu Vallinu, 3 marzu 2018

 

Umagiu di Stéphanie  Raffini, prufissore di e scole in Aiacciu

 

MAESTRA

Si pripara a matina

I libri ind’a cartina

U surrisu nant’e labre

Hè ora, a scola s’apre

 

U salute hè di rigore

I quaderni sò aperti

E penne arritte è fiere

I cerbellucci sò pronti

 

A maestra aiutarà

A maestra spiegarà

A maestra s’annervarà

A so parte ghjucarà

 

A recreazione sonna

L’ancuccie sò pront’à corre

S’inventa castelli è torre

Prestu compia la matina

 

Hè ora di fà merenda

È ancu di a faccenda

Penna rossa per curreghje

È spechjettoni per leghje

 

Avà mumentu di scenze

Hè ora di e sperienze

Litteratura, puesia

Storia è geugraffia

 

Tempu di scrive i duveri

D’accuncià a so cartina

Cù surrisi chì sò veri

È ochji assai fieri

 

A maestra si ne entre

È fallanu e maschere

Per ritruvà cù gran’piacè

L’amore di i so zitè

 

Di sicura hè troppu stanca

Ma u maritu l’affianca

Chì issu mistieru famosu

Hè duru è primurosu

 

A sera cù l’ochji spenti

Ripensa à i so prughjetti

Cusì hè fattu iss’opera

Di lavoru è di mira

Di surrisi è di core

Di pazienza è d’amore

Partager cet article
Repost0

commentaires

Articles Récents