1 octobre 2008
3
01
/10
/octobre
/2008
17:56

Hè ufficialmente slanciatu u primu premiu Orezza di literatura corsa chi serà rimessu di ghjunghju 2009 nant’a u situ di l’acqua acitosa. A sucietà di l’acque d’orezza adunita à l’edizione Cismonte e Pumonti/Matina Latina, cù a participazione di l’Adecec, anu decisu di creà issu premiu per fà scopre talenti novi, svegliendu a brama di scrive in lingua nustrale.
A ghjuria si cumpone di Iviu Pasquali (presidente), Ghjiseppu Leoni, Pantaleone Alessandri, Marceddu Jureczek, Lisandru Muzy è Stefanu Pergola.
Cuncernendu u regulamentu, u puntu principale per ogni participanti, hè d’un’esse mai statu editatu. U premiu hè apertu à tutti, da 7 a 107 anni. I scritti di i zitelli è quelli di i maio’ seranu ricumpensati staccatamente.
Ben intesu i scritti devenu esse in lingua corsa, da qualchi pagina à un’ottantina, mandati per posta o per mail, nanz’à u 31 dicembre 2008.
Per posta à l’indirizzu, Premiu Orezza di literatura corsa, S.N.E.E.M.O, Acqua Acitosa, 20229 Rapaghju.
Per mail à info@orezza.fr .
I participenti ponu scrive à modu soiu, nant’à u sugettu di a so scelta, ch’ellu sia in puesia, in prosa o di manera libera.
A ghjuria dumanda à i maestri e prufessori d’incuraggi’ i so elevi à cuncorre à issu premiu. Ognunu hè invitatu à dassi di rimenu per a scrittura in lingua corsa. Per sapenne di più, bisogn’à scrive à Iviu Pasquali,à l’indirizzu mail di a sucetà di l’acque d’Orezza.
