Dopu à Bastia, Aiacciu, Isula Rossa, hè in Corti chi Linguimondi s’hè firmatu, u tempu di e ghjurnate eurupee di e lingue, urganisate da a Culletività Territuriale di Corsica. L’università di Corsica accugliendu a manifestazione, durante trè ghjorni. A u prugramma, cunferenze, mostra di l’attori di a lingua corsa, cuncertu di I Mantini, cuncorsi di puesia et di lingua azzione, per compie in Capicorsu cù a visita di l’isula di Capraia.
L’ADECEC era prisente à a manifestazione, per prisentà l’applicazione muderne di a banca di dati INFCOR.
So parechje anni chi l’Adecec hà sceltu a via di e nove tecnulugie à pro di a lingua. Per chi a so sparghjera sia à più maio pussibile. L’apertura di u situ internet, una vint’anni fà, hà permessu sopratuttu di fà cunosce è aduprà, u prugramma INFCOR (infurmatica corsa).
S’agisce d’una banca di dati, più ch’un dizziunariu di lingua corsa, guasi un enciclupedia, postu chi ci so sin’à 17 rubriche per ogni parulla (definizione, traduzzione, sinonimi, prununcia, analugie, citazioni d’autori, gramatica, è altre…).
Cun l’impiegu di e Nove Technulugie d’Infurmazione è di Cummunicazione, l’ADECEC hà fattu a scelta d’aduprà l’arnesi muderni à u serviziu di a lingua è di a cultura corsa, in u filu di i so scopi, chi so a salvezza è a prumuzione di a lingua.
