Qualchì parulla di u presidente
In u 1998 a ghjurnata di a lingua corsa di l’ADECEC trattava di Teatru è teatrini. Si parlava di l’umanu, di ghjente. Oghje simu ind’u virtuale. Si spera è si parla di cuufficialità.
Prugressu, avanzata boh !
Dicerebbi, tutte chjachjere. Dicerebbi, ùn simu mai stati tant’à cavallu. Ma incù a paura chì l’animale ùn arpii. Tenimu a briglia in tiru.
A l’epoca Ghjiseppu Leoni fece a prisentazione, Ghjacumu Thiers ci parlava di « A diglossia è u so paradossu » o « u sviluppu di a spressione teatrale in situazione di diglussia ».
Dumenica Verdoni « trattava di « U teatru in cerca di media » è a stallazione di lochi di spettaculu.
Geniu Gherardi dicia u so parè nantu « U teatru sacru organizatu pè u più da e cunfraterne, prima inde e cità, è pocu à pocu in i paesi. »
Petru Mari fece l’introitu : « Prisentazione di u contrastu » è dicia :
Si saranu mai maritati teatru è media. Oghje si porebbe dì : si saranu mai maritati teatru è cuufficialità.
E dinù aghjustandu :
« Teatru è cuufficialità si cercanu, aripicati à una sucetà corsa ch’ùn s’hè ancu à truvà ».
Ci pensemu o piuttostu ci ne parla Geniu Gherardi 17 anni dopu…
